«ՏՀՏ լիդերների հանդիպում»-ֆորումը կազմակերպվում է 2007թ.-ից ի վեր և նպատակ ունի մեկ վայրում հավաքել մասնավոր և պետական հատվածների ներկայացուցիչներին և ոչ ֆորմալ մթնոլորտում քննարկել ՏՀՏ ոլորտին առնչվող առաջնային խնդիրները: Միջոցառման կազմակերպիչներն են Ինֆորմացիոն տեխնոլոգիաների ձեռնարկությունների միությունը, ՀՀ էկոնոմիկայի նախարարությունը և ՀՀ կրթության նախարարությունը:

  Ս.թ. հունիսի 12-13-ը Ծաղկաձորի «Կեչառիս» հանգստյան տանը տեղի ունեցավ հերթական «ՏՀՏ լիդերների հանդիպում» ֆորումը, որը նվիրված էր Տեղեկատվական և հեռահաղորդակցական տեխնոլոգիաների /ՏՀՏ/ հիմնախնդիրներին կրթության և աշխատուժի զարգացման ոլորտում:

  Հիմք ընդունելով նույն խնդրին վերաբերող 2009թ. սեպտեմբերի 17-19-ը կայացած հանդիպման արդյունքում ընդունված որոշումները՝ այս ֆորումի ընթացքում քննարկվեցին հետևյալ թեմաները.

1. Կրթական պրոցեսի մասնակիցների (դասախոսներ, ուսանողներ, պետական կառավարման մարմիններ) մոտիվացիայի և հավակնությունների բարձրացման խնդիրներ:
2. Կրթական ծառայությունների մատակարարների (ԲՈւՀ-եր) և պատվիրատուների (բիզնես, համապատասխան պետական կառույցներ, ծնողներ) կապի ձևավորում:
3. Ինչպես վերականգնել ԲՈւՀ-երը` որպես գիտահետազոտական կենտրոններ:
4. Առկա կրթական լուծումների ներկայացումներ

  Միջոցառմանը մասնակցեցին ՏՀՏ ոլորտի ընկերությունների, համապատասխան նախարարությունների և գերատեսչությունների, հասարակական, միջազգային կազմակերպությունների և մամուլի 93 ներկայացուցիչներ: Ֆորումին ներկա էր նաև ՀՀ էկոնոմիկայի նախարար Ներսես Երիցյանը:

   Ֆորումի աշխատանքների ընթացքում որոշում ընդունվեց ստեղծել աշխատանքային խումբ՝ ՀՀ էկոնոմիկայի նախարար Ներսես Երիցյանի գլխավորությամբ, որին ի կատարում կհանձնվեն ֆորումի արդյունքում մշակված դրույթները:

   «ՏՀՏ լիդերների հանդիպում» ֆորումի հովանավորն էր «Նորք» տեղեկատվավերլուծական կենտրոնը:

2007-2010թթ. ընթացքում ֆորումում քննարկվել են հետևյալ հարցերը.

•    ՏՀՏ կիրառումը բիզնեսի այլ ոլորտներում:
•    ՏՀՏ կրթություն:
•    Ձեռներեցություն և ենթակառուցվածքներ:
•    Հեռահաղորդակցություն և անվտանգություն:
•    Մաքսային բարեփոխումներ :
•    IPO և այլն :

Մասնակիցներ. 2007-2009թթ. ֆորումին մասնակցել են շուրջ 120 կազմակերպությունների ներկայացուցիչներ: ֆորումի հովանավորներն են եղել Արմենիան Դեյթաքոմ Քամփնի, Ձեռնարկությունների Ինկուբատոր հիմնադրամ, Մայքրոսոֆթ, Յուքոմ, Ericsson և այլ ընկերություններ:

Ֆորումում ՀՀ նախարարների մասնակցությամբ և ամփոփմամբ քննարկված հարցերը մշակվում և ներկայացվում են ՀՀ համապատասխան գերատեսչության ղեկավարությանը կամ ՀՀ վարչապետին: